Thursday, July 31, 2014

ආදරය යනු කුණුහරුපයක් වූ රටක......



අඬ බෙර ගසමින් ලොව දසත අවධානය ගත් ඔවුන් අවසානයේ බේරේ වැව මධ්‍යයේ ආදරය සඳහා පර්චස් කීපයක් වෙන් කිරීමට තීරණය කොට තිබිණි. එය පෙම්වතුන්ගේ දූපත(Lovers' island) ලෙස නම් තැබීය. ජාති, ආගම්, කුල මල බේදයකින් තොරව එහි ආදරය පැතිරෙමින් පැවතුනි. ෆර්දාවෙන් මුහුණ වසාගත් වුන්, ධර්ම චක්‍ර, කුරුස ගෙල පැළඳි වුන් එක පුංචි දූපතක තැන් තැන් වල ආදරය කරමින් සිටියේය. නමුත් මේ පෙම්වතුන් තමන්ට පොදු සතුරෙක් සිටින බව පසක් කරගන්නා විට සියල්ල සිදු වී හමාර ය. 

සතුරා, පෙම්වතුන්ගේ දූපත දෙස ක්‍රෝධයෙන් රත් පැහැ ගැන් වූ දෙනෙත් යොමාගෙන සිටියේ ය. ඔහු මුළු ජීවිත කාලය පුරාවටම පාහේ සතුටක් ලැබූ සාධකය වන යුද්ධය නැති වී ගොස් තිබිණි. තව දුරටත් ඔහුට සතුටු වන්නට යමක් නොතිබිණි. ඔහුට ජීවිත කාලය පුරාවටම ආදරය ලැබී තිබුණේ නැත. ඔහු ආදරය ඉගනගෙන තිබුණේ නැත. ඔහුගේ කාමරය පුරා විසිරී තිබෙන හින්දු, බෞද්ධ, ඉස්ලාම්, ක්‍රිස්තියානි දහස් සංඛ්‍යාත ධර්ම ග්‍රන්ත අතරේ ආදරය ගැන ලියවී තිබුණේ නැත. එකී පොත්පත් වල ආදරය නමින් අසමාන තාවය, මමත්වය සහ වෛරය උගන්වා තිබිණි. පෙම්වතුන් අතර හුවමාරු වන ප්‍රේමනීය හාදුවක රසය පිළිබද එකී පොත්පත් වල කිසිඳු සටහනක් නොවීය.

පෙම්වතුන්ගේ දූපතේ හුවමාරු වන හාදු දෙස බලාසිටි සතුරාට තමන් නොලැබූ දෙයක් ලබන තාරුණ්‍යය කෙරෙහි ඊර්ෂ්‍යාවක් ඇති විය. තම කාමරයේ ඇති දහස් සංඛ්‍යාත ධර්ම ග්‍රන්ථයන්හි සඳහන් නොවෙන යමක් සිදුකරන මිනිසුන් කෙරෙහි ක්‍රෝධයක් ඇති විය. ඊර්ෂ්‍යාව සහ ක්‍රෝධය අතර අතරමං වූ සතුරා කිරි කිරි හඩින් දත්මිටි කන්නට විය. 

කාලය ගතවන්නට විය සතුරා තමාට සතුටක් ලබත හැකි කිසිවක් ගැන කල්පනා කරමින් කල් ගත කරන්නට විය. එක්තරා මොහොතක දී ක්‍රෝධයෙන් රත් පෑ ගැන් වූ දෙනෙතින් සතුරා කාමරය පුරා විසිරී ඇති දහස් සංඛ්‍යාත ධර්ම ග්‍රන්ථ දෙස බලා කට කොණකින් සිනා සෙන්නට විය. 

කෙමෙන් කෙමෙන් සතුරාට සතුටු විය හැකි කාලයක් උදා වන ලකුණු පහළ වන්නට විය. සතුරාගේ කාමරය පුරා විසිරී තිබුණු දහස් සංඛ්‍යාත ධර්ම ග්‍රන්ථ පිළිවෙලට අසුරා තිබුණි. එක එක ආගම සඳහා වෙන වෙනම අල්මාරි සාදා තිබිණි. අදාල ධර්ම ග්‍රන්ථ අදාල ආගමික අල්මාරියේ පමණක් තැන්පත් කර තිබිණි. අල්මාරි එකිනෙකට ලං වුව හොත් ධර්ම ග්‍රන්ථ එකිනෙකා ගැන අවබෝධයක් ලබාවි යැයි බියෙන් මෙන් සතුරා අල්මාරි හැකිතාක් එකිනෙකට දුරින් තබා තිබිණි.

වැඩි කලක් යන්නට මත්තෙන් සතුරාට යලිත් සතුටු විය හැකි කාලයක් උදා විය. ධර්ගා නගරයෙන්, අලුත්ගමින් කලු දුමාරයන් අහසට නඟින දෙස බලා සතුරා මහා හඬින් සිනා සෙන්නට විය. ඔහුගේ ගොරහැඬි හඩින් අල්මාරි වල වීදුරු දෙදරන්නට විය. අහිංසක මිනිසුන් දුක් මහන්සියෙන් උපයාගත් ගේ දොර, යාන වාහන පිලිස්සී යන දෙස බලා සතුරා සතුටින් ඉපිලෙන්නට විය. සතුටින් ඉපිලෙන අතරම සතුරාගේ දෑස් අවිඥාණිකවම පෙම්වතුන්ගේ දූපත දෙසට යොමු විය.

සතුරාගේ සතුට ක්ෂණිකව අතුරුදන් විය. පෙම්වතුන්ගේ දූපත පුරා ආදරය ඉතිරී යමින් තිබිණි. පෙම්වතාගේ අතේ එල්ලී යන ෆර්දාවෙන් මූණ වසාගත් තරුණියක් තවත් පෙම්වතෙකුගේ අතේ එල්ලී යන ධර්ම චක්‍ර සංකේතයක් කරේ එල්ලා ගත් තරුණියක හා ලෙංගතුව සිනාසෙන අයුරු සතුරාට නෙත ගැටිනි. තවත් එවැනිම පෙම්වත් යුගල් දෙකක් එකම බංකුව බෙදාගෙන අසුන්ගෙන සිටියේ ය. සතුරා ක්‍රෝධයෙන් ගැහෙන්නට විය. සතුරාගේ සතුට නසන එකම සාධයක ආදරය බව සතුරාට එවෙලේ පසක් විය. ඉහවහා ගිය ක්‍රෝධයෙන් දැවෙමින්, ගැහෙන දෙඅතින් සතුරා තමාගේ දුරකතනය ගත්තේ ය. 1.....1..............9 ඔහුට ඇමතීමට අවශ්‍ය වූ අංකය එයයි.

පැය බාගයක් ගතවීමටත් මත්තෙන් පොලිස් රොබෝවන් පෙම්වතුන්ගේ දූපත ආක්‍රමණය කළේ ය. ඔවුන් රොබෝවරුන් බැවින් දැන සිටියේ අණ ක්‍රියාත්මක කිරීමට පමණකි. කුඩ ඉහලාගෙන සිටින සියලුම පෙම්වතුන්ට කුඩ අකුලන්නට අණ ලැබිණි. නමුත් සතුරා ඉන් සෑහීමකට පත් නොවිනි. ඔහු නැවතත් සුපුරුදු අංකයම අමතන්නට විය. ඔහුට අවැසි වූයේ පෙම්වතුන්ගේ දූපතින් ආදරය අතුගා දැමීමටයි. ඒ මොහොත වන විටත් ආදර සාධයක ඇති වන සියලුම ස්ථාන විනාශ කිරීමට සතුරා තදින් අදිටන් කරගෙන සිටියේ ය. පොලිස් රොබෝවරු යළිත් පෙම්වතුන්ගේ දූපත් ආක්‍රමණය කළේය. මෙවර පෙම්වතුන්ට තරමක් දුරින් වාඩි වී සිටීමට අණ ලැබිණි. නමුත් සතුරා සෑහීමකට පත් නොවීය.  ඔහු දිගින් දිගටම ඇමතුම් ගන්නට විය. අවසානයේ සියලුම පෙම්වතුන් දූපතින් පන්නා දැමීමට පොලිස් රොබෝවන් තීරණය කොට තිබිණි. ඉන් පසුව පෙම්වතුන් රැස්වන සෑම දිනයකම පාහේ සතුරා සුපුරුදු අංකයම අමතන්නට විය.

අවසානයේ පෙම්වතුන්ගේ දූපතින් පෙම්වතුන් සදාකාලිකව පන්නා දැමීමට පොලිස් රොබෝවන් තීරණය කළේ ය. දැන් පෙම්වතුන්ගේ දූපත යනු පෙම්වතුන් මුක්ත කලාපයකි. හිස් වූ දූපත දෙස බලන සතුරාට දැන් සියුම් සතුටක් දැනෙයි. මේ මොහොත වන විටත් සතුරා ජයගෙන සිටියි. පෙම්වතුන්ගේ දූපත ආදරය සොයන අතර රට අතරමං වී ඇත.

(මෙය මනඃකල්පිත කතාවක් නොවේ)
෴෴


පින්තූරෙ - http://www.ilovegenerator.com/large/stop-love-love-131548869878.png

20 comments:

  1. එල ද බ්‍ර.
    මනංකල්පිත කතාවක් නෙමෙයි?

    ReplyDelete
    Replies
    1. නැහැ මනඃකල්පිත කතාවක් නෙමේ

      Delete
  2. මේ කියන්නේ නවම් මාවතේ යනකොට පේන දුපතද?

    මේ කතාවේ අතුරු කතා මට පේලියක් මතක් වෙනවා... මෙතන කියන්න ගියොත් පොස්ට් එකක් වෙයි

    ReplyDelete
    Replies
    1. ඔව් ඒ දූපත තමා.
      අවුලක් නැතිනම් මෙතනම කියලා දාන්න

      Delete
    2. කෙටියෙන් කියන්නම් අදහස... මේක මගේ අදහස මිසක් සමස්ත ස්ත්‍රී සංහතියේ අදහස නෙවෙයි කියල මතකේ තිබ්බොත් කියෝන දේ වැටහෙයි

      ආදරේ කරන එකත්, පෙන්වන එකත් කාගෙවත් පාලනයක් ඕනේ දෙයක් කියල මම හිතන්නේ නැහැ. අදටත් ආදරේ කරන/ ආදරෙන් ඉන්න දෙන්නෙක් දැක්කම මගේ හිතේ සතුටක් ඇතිවෙනවා. තමන්ගේ ආදරේ අනිත් කෙනාට පෙන්වන එකත් ආදරේ හිතේ තියන් ඉන්නවට වඩා වැදගත් කියලයි මගේ අදහස. අපි වැඩිපුරම දකින, කතා කරන, විදින ආදරේ තියෙන්නේ තරුණකමේ කියල හිතන්නේ නැහැ මම. ගොඩක් වයසක දෙන්නෙක් අත් අල්ලාගෙන/කුඩයක් යටින් තුරුල් වෙලා යන එක මට නම් සතුටු කාරණයක්

      1. ඔය කියන දුපතේ මැද්දේ ඉන්න 'සමහර' ජෝඩු ආදරේ කරනවද කියල මට ගොඩක් සැක හිතිලා තියෙනවා. මොකද, පොඩ්ඩක්වත් තමුන් ඉන්න තැන ගැන සිහියක් එයාලට නැහැ. ඔතන මම ගොඩක් දකින්නේ සමාජයේ එක කොටසක් ගොඩක් වෙලාවට. මම හිතන්නේ එයාලට තේරුම් කරන්න අමාරුයි 'නීතියක්' නැත්තම්.

      2. දෙන්නෙක් එක ළඟට වෙලා, පොඩියට තුරුල් වෙලා හිටිය කියල විතරක් ආදරේ 'පේනවා' කියල මට හිතෙන්නේ නැහැ. සාය පොඩ්ඩක් කොට උනොත් පාරේ ඉන්න සමහර උන්ට ඔලුව කචල් වෙන සමාජයක, පොඩි 'හග්' එකක් කුපිතකිරිල්ලක් වෙන්නේ නැද්ද? කොතනද ප්‍රශ්නේ?

      මම හිතන්නේ නැහැ ආදරෙන් ඉන්න දෙන්නෙක්ගෙන් අනික් අයට හිරිහැර වෙනවා කියල. කොතනින්ද අපි ලයින් එක අඳින්නේ?

      Delete
    3. "මේක මගේ අදහස මිසක් සමස්ත ස්ත්‍රී සංහතියේ අදහස නෙවෙයි කියල මතකේ තිබ්බොත් කියෝන දේ වැටහෙයි"
      මේ වාක්‍යය නොතිබ්බත් මම ඔහොම හිතන පූසෙක් නෙමෙයි!

      ලයින් එක අඳින්න ඕනේ අපේ රටේ මිනිස්සුන්ගේ ඔළුවේ නෙමේ ද? මං ඒ නිසාමයි මේකේ මාතෘකාව දැම්මේ ආදරය යනු කුණුහරුපයක් වූ රටක කියලා. අපේ රටේ ආදරය කරන ජෝඩුවක් දිහා ගොඩක් මිනිස්සු බලන්නේ හරිම නරක දෙයක් කරනවා වගේ. ආදරය කියන්නේ නරක දෙයක් නෙමෙයි. වෛරයයි නරක. හැබැයි අපේ මිනිස්සු වෛරයයි තලු මර මරා රස විඳින්නේ.
      අපේ රටේ බහුතරයක් එහෙමයි. ඒකයි මං කිව්වේ මිනිස්සුන්ගේ ඔලුවේ ලයින් එක අඳින්න ඕනේ කියලා. මම විශ්වාස කරන දෙයක් තමයි මිනිස්සුන්ගේ අදහස් ආකල්ප දියුණු නොවී, පාරවල් හෝටල් හැදුව පමණින් රටක් දියුණු වෙන්නේ නෑ කියන එක.
      ආදරයට ආදරේ කරන මිනිස්සු වැඩි ප්‍රමාණයක් ඇති වුණු කාලෙක මේ රට ලස්සන වේවි කියලා මට හිතෙනවා.

      Delete
  3. ඇත්තටම එහෙම වෙයිද....

    ReplyDelete
    Replies
    1. මං හිතන්නේ දැනටම එහෙම වෙලා බං....

      Delete
  4. අපූරු යි. අපූරු යි. සංකේතාත්මක යි....

    ReplyDelete
  5. ප්‍රබල මදි..කතාව අපි හිතන විදියටම අහවර වෙනවා..

    ReplyDelete
    Replies
    1. වෙන්න පුළුවන්... මොකද මේක මම හදපු අවසානයක් නෙමේ

      Delete
  6. awindu dampahala, කුරුටු ගෑ ගී පොත
    බොහොම ස්තූතියි අදහසක් දාලා ගියාට :)

    ReplyDelete
  7. තවත් පැයට දෙකට රූම් විකිනෙන පොඩි හෝටල් හෝ නවාතැන්පොලවල් වැඩි වේවි බන්..

    ReplyDelete
  8. තාරුණ්‍යට ආදරය කරන්න
    තරුණ තරුණියන්ට ආදරය කරන්න ඉඩ දෙන්න, ඉඩ හදා දෙන්න
    නාකි අපිත ඉරිසියාවයි තමයි
    ඒත් කල යුතුම දෙයක්

    ReplyDelete
  9. වෙන වෙනම අල්මාරි දෙකක තියෙන පොත් දෙකක අකුරු හතරක් අරන් ආදරය හදන්න බැ කියලය් ගොඩක් අය හිතන්නේ :(

    ReplyDelete
    Replies
    1. බින්ගෝ මම ඔයාගේ බ්ලොග් එක කියවන නිසා ඔයාගේ කතාව දන්නවා. ඕක හරිම කණගාටුදායක තත්වයක්. අපේ රටේ මිනිස්සු ජාති ආගම් කුලමල මේ සේරම ඔලුවේ පුරවගෙන, සේරම පටලගෙන ජීවත් වෙන්නේ.
      අපි කොහොම හරි මේ දේවල් වෙනස් කරන්න උත්සහ කරන්න ඕනේ කියලයි මං හිතන්නේ. වෙන කවුරුවත් වෙනස් වෙන්නේ තැනිනම් අඩුම ගානේ තමන්වත්.....

      Delete
    2. perfume balala thiyenawada??? i wish you could write about it if you think it's worth it ...

      Delete
  10. මේකට නම් ජාතිවාදයට වඩා සුදුසුම වචනේ කුහක කම කියලයිමට හිතෙන්නේ..පොලිසිය රොබෝ වෙලා තියෙන්නෙත් ආදර දූපත හිස් වුනෙත් රට අතරමං වුනෙත් මේ කුහක කම නිසා..

    ReplyDelete
  11. ප්‍රිය ඇඩ්මින් වෙත,

    ඔබේ බ්ලොග් අඩවියත් විකසිත සින්ඩියට එක්කර ගන්න. (Blog Syndicator)
    Blogger සහ WordPress බ්ලොග් අඩවි සදහා එම අඩවියේ URL එක සහ බ්ලොග් එකෙහි නම ලබාදුන් සැනින් ස්වයංක්‍රියව සින්ඩිය හා ඇමුණුම සිදුවේ.
    බ්ලොග් නොවන නමුත් Feeds සක්‍රිය වෙබ් අඩවි වුවද සින්ඩිය හා ඇමිණිය හැකිය.
    විකසිත සින්ඩිය :- http://www.syndi.wikasitha.com/

    මිට හිතාදර
    ඇඩ්මින් - විකසිත සින්ඩිය. (info@vweb.lk)

    ReplyDelete

ඔබේ අදහස් තමයි වටින්නේ. යෝජනා චෝදනා ඇතුලුව ඕනෑම දෙයක් සතුටින් බාරගන්නවා. මූණ නොපෙන්නා බණින්න anonymous පාවිච්චි කරන්න.

Related Posts Plugin for WordPress, Blogger...