ඇයි කෙල්ලෝ මෙහෙම කරන්නේ :'( .....(මේ දැන් වුන ඇත්තම ඇත්ත කතාවක්)

දැන් වෙලාව රෑ 11.52යි මේ වගේ ලිපියක් ලියනවා තියා හිතකවත් තිබ්බේ නෑ. මේක ලියන්නේ දුක මිශ්‍රිත තරහකින්.
දැන් පැයකට විතර කලින් මගේ ඉන්න හොඳම යාළුවෝ හතර පස් දෙනාගෙන් එකෙක් මට ෆේස් බුකියේ චැට් කළා.

මචං පූසා
උඹ ඉන්නවද?
පුළුවන්නම් ස්කයිප් එක දාපන්කෝ

වෙනදා හද්ද කුණු හරුපයකින් කතා කරන එකාට අදනම් මොකක් හරි අවුලක් කියලා මට නිකමට වගේ හිතුනා.

මුලින් මම මගේ යාළුවා ගැන හඳුන්වලා දෙන්නම්.
මිනිහා ගැන පිටින් බලන කෙනෙක්ටනම් හිතෙන්නේ අමුම අමු පිස්සෙක් කියලයි. ඒත් ඌව ආස්‍රය කරන උන් තමයි දන්නේ උගේ ඇතුලින් ඉන්න හිත හොඳ කොල්ලාව. මට මගේ යාළුවාව මුලින්ම් හම්බ වෙන්නේ 10 වසරේදී විද්‍යාව අතිරේක පංතියකදී මගේ වෙන් යාළුවෙක් නිසා. ඇත්තටම මටත් ඒ දවස් වල මිහාව වැඩිය දිරෙව්වේ නෑ. ඒත් පස්සේ පස්සේ මට තේරුනා ඒකා පිටින පේන එකා නවෙයි කියලා. මම ඌත් එක්ක ගොඩාක්ම ෆිට් උනේ ඒලෙවල් කරන කාලේ. අපි ගියේ එකම පංති වලට නිසා මට මිනිහාව ගොඩක් ආස්‍රය කරන්න ලැබුණා. රටේ ප්‍රසිද්ධම පාසලකට ගියත් ඒ පාසල් වල ඉන්න සමහර උන් වගේ ලොකු පාසලකට යනවයි කියලා පොඩ්ඩක්වත් ආඩම්බර උනේ නෑ කවදාවත්.

ඒ තරම් පිස්සු කෙළින එකෙක් මම කවදාවත් දැකලා නෑ. ඉස්කෝලේ එකෙක්ගේ වලියක්නම් ඌ එතන. මම ඇස් දෙකෙන්ම දැක්කා ඒකා වෙන කාගෙද වලියකට ගිහින් පස්සේ අනිත් උන් ගහන්න හෙව්වේ වලිය පටන් ගත්ත එකාව නෙවෙයි මගේ යාළුවාව. ඔය ඔක්කෝම ජරමර අස්සේ මිනිහා කෙල්ලෙක් එක්කත් යාළුවෙලා හිටියා. ඒලෙවල් ඉවර උනාම ඒ කෙල්ලව මොරටුව යුනියට සෙට් උනා. අපේ එකා ලාවට පාස්. ඒ ගෑණි මගේ යාලුවාව අත හැරියා. මම දැක්කා යාළුවා ගොඩාක් දුක් වෙනවා. පස්සේ මිනිහා ඔක්කෝම දේවල් අමතර කරලා කොහොම හරි යුනි යනවාමයි කියලා වැඩට බැස්සා තරහටත් එක්ක. කොහොම හරි දෙවෙනි පාර මොරටුවට බැරි උනත් කොළඹ යුනි මිනිහට සෙට් උනා. දෙවෙනි පාර ඒලෙවල් අතරේ තමයි වෙන කෙල්ලෙක්ව මගේ යාළුවාට සෙට් උනේ.

ඒ කෙල්ලත් එක්ක නම් මිනිහා ෆුල් බොක්කෙන්මයි යාළු වෙලා හිටියේ. හැමදාම බොන්නම හොයන එකා ඒ කෙල්ලව යාලු උනාට පස්සේ දෙන්නා අතරේ ඇඟට දැනෙන ප්‍රශ්නයක් ඇති වුන දවස වෙනකම්ම බිව්වේ නෑ.

යාළු වෙලා මාස තුනක් ඇති දවසක් කෙල්ලට ඉගෙන ගන්න එකේ එක්සෑම් ෆී ගෙවන්න සල්ලි නෑ කියලා ඉන්නකොට(කෙල්ල ප්‍රයිවට් තැනක ඉගෙන ගන්නේ) මගේ යාළුවා ඌ ගාව තිබ්බ සල්ලි සේරම එකතු කරලා ඒ කෙල්ලට  දුන්නා. ඒ එක්කම කෙල්ලට මොනවදෝ ප්‍රශ්න නිසා මගේ යාළුවාගෙන් ඒ ගෑණි ඈත් වෙන්න හදපු වෙලාවක ඒ ගෑණිගේ ගෙදරට ගිහින් කතා කරන්න ඕනේ කියලා දවසක් ගියේත් අපේ ගෙදරට ඇවිල්ලමයි.

ඔය මම දන්නේ දේවල් ටිකක් විතරයි. මට හොඳටම විශ්වාසයි කෙල්ලට සල්ලි ප්‍රශ්න එහෙම තිබ්බ නිසා මගේ යාළුවා ඒකිට ගොඩාක් උදව් කරන්න ඇති. මගේ යාළුවා ඒවා හැම තැනම කිය කියා යන එකෙකුත් නෙවෙයි. බීලා ඉන්න වෙලාවක වැරදිලා කියෙව්වොත් මිසක් නැත්තම් දැන ගන්න වෙන්නෙම නෑ.

අද මහ රෑ මිනිහා මාත් එක්ක කතා කළේ අඩ අඩා. ඇත්තටම ඌ අද තරම් මානසිකව වැටිලා ඉන්නවා මම කවදාවත් දැකලා නෑ. උන්ගේ ගෙදරත් සල්ලි ප්‍රශ්න ඕන තරම්. මිනිහගේ පර්ස් එකේ සමහර දවස් වලට යන්න එන්න සල්ලි විතරක් තියනවා මම ඕන තරම් දැකලා තියනවා. ඒත් හැමතිස්සේම හිනා වෙලා ඉන්න එකා අද අඩනවා දැක්කාම මට මට පුදුම විදිහට දුක හිතුනා.
මගේ යාළුවායි කෙල්ලයි අතරේ මොකක් හරි පොඩි ප්‍රශ්නයක් කාලයක් තිස්සේ ඉඳන් තිබ්බා. ඒත් දෙන්නා නිතරම හම්බ වුනා. කතාකළා. අද මගේ යාළුවා මට කතා කරලා මෙහෙමයි කිව්වේ.( මේ මුළු දෙබස පුරාම් මිනිහා අඩ අඩා කතා කළේ)

මචං පූසා
මගේ ගෑණි වෙන කොල්ලෙක් එක්ක යාළුවෙලාලු බං

මොකක්?

ඔව් බං

පලයන් බොරු කියන්නේ නැතුව

සිරාවට බං මම මේ දැන් කතා කළේ බං. මට මාර අප්සට් බං මට මේක කියන්න කියන්න කතා කරන්න කවුරුත් නෑ බං. මම ඒකයි උඹට කතා කලේ.

විහිළුවට කියනවාද දන්නේ නෑ බං. කෙල්ලෝ ඔය වගේ කතා කියල නිකම් ටෙස්ට් කරලා බලනවා බං

නෑ බං නෑ මම දැන් පැයකටත් වඩා ඒකිත් එක්ක කතා කළා බං.

ඒකිද උඹට කිව්වේ ඒකි යාලුයි කියලා වෙන කොල්ලෙක් එක්ක.

මම දැක්කා බං ෆේස්බුක් එකේ කොල්ලෙක් ඒකිගේ ෆොටෝස් වලටයි හැම මඟුලකටම කමෙන්ට් කරනවා. මම ඒකිගෙන් ඇහුවාම තමයි කිව්වේ.
මට තේරෙන්නේ නෑ බං ඇයි බං මට ඒකි මෙහෙම කළේ. උඹ දන්නවා බං මම ඒකිට කොච්චර දේවල් කළාද කියලා. අඩුම තරමේ මට කියන්න තිබ්බා බං මම අහනකම් ඉන්නේ නැතුව. මට තේරෙන්නේ නෑ බං මොනවා කරන්නද කියලා. අනිද්දා මට යුනි එකේ එක්ස්සෑම් බං තාම පොතක් අතින් අල්ලලාවත් නෑ. මේ පාර මට එක්සෑම් කරන්න නම් බෑ බං. මට දැන් එයාත් නෑ එක්සෑමුත් නෑ අනේ මන්දා බං.

ඌ කියාගෙන කියාගෙන ගියා. මම පුළුවන් තරම් දේවල් කියලා හිත හදන්න බැලුවා. මම දන්නවා මගේ යාළුවා ගැන. ඒකා අද රෑට එක මොහොතක්වත් නිදාගන්නේ නෑ. හෙට නැත්තම් ලඟදීම දවසක සමහර විට මට කතා කරයි බොන්න යන්න. සමහර විට කතා කරන එකක් නෑ. මේ දවස් වල ඒකා අතේ සත පහක් නෑ. කොහොම හරි කරලා මොන මොනවා හරි කියලා එක්සෑම් එක කරන්න යවන්න ඕනේ.

බයේ බෑ මේ කෙල්ලෙක් හින්දා මූ හැම දෙයක්ම නැති කර ගනීද? නෑ නෑ ඌට මොලේ තියනවා. මිනිහා වලට යන එකක් නෑ.

මට හිතා ගන්න බැරි ඇයි කෙල්ලෝ මේ වගේ කරන්නේ කියලා. අනිවා ආයේ කතා දෙකක් නෑ ඒ කෙල්ලට මගේ යාළුවාට වගේ සල්ලි ප්‍රශ්න නැති හොඳ සල්ලි කාරයෙක් එක්ක යාළුවෙලා ඇති. ඒත් ඇයි ඇයි එහෙම කරන්නේ? මම විතරයි දන්නේ අද මගේ යාළුවා කොච්චර දුක් වෙනවාද කියලා. මගේ යාළුවා අද නිදාගන්නේ නැතුව අඩ අඩා ඉන්නකොට ඒකි අලුත් කොල්ලත් එක්ක නිදිවරාගෙන හිනා වෙවී මල් කඩනවා ඇති. මට හිතා ගන්න බෑ මේ කෙල්ලන්ගේ හැසිරීම. මට දුකයි මගේ යාළුවා ගැන ඊට වඩා කේන්තියි අර කෙල්ලත් එක්ක. ඕකි ඉගෙන ගන්නේත් මම ඉගෙන ගන්න තැනමයි. වෙන පංතියක ඉන්නේ. කමක් නෑ අහුවෙන්නැතෑ සඳුදාට.


ප.ලි: හෙට මම මගේ යාළුවාගේ හිත කොහොම හරි පොඩ්ඩක් හරි හදන්න ඕනේ. එයගේ හිත හදන්න මම මොනවා කියන්නද කියලා මට හිතා ගන්න බෑ. මම මොනවා කියන්නද?
දැන් වෙලාව 1.45 යි තව ටිකක් කල්පනා කරලා බලන්න ඕනේ.